Boku shahrida o‘tkazilayotgan taekvondo bo‘yicha jahon chempionatida bugun ikki nafar hamyurtimiz bahslarda ishtirok etmoqda.

Ayollar o‘rtasida 62 kg. vazn toifasida Feruza Sodiqova birinchi bosqichdan ozod etilgan bo‘lib, ikkincha bosqichda bolgariyalik raqibini mag‘lub etgandi. Tushdan keyingi janglarda esa hamyurtimiz latviyalik Yolanta Talvidaga qarshi dayanga chiqdi va katta qiyinchiliksiz ikki raund yakuni bo‘yicha mag‘lub etdi. Endi Feruza yarim final yo‘llanmasi uchun vengriyalik Viviana Martonga qarshi jang qiladi. Ushbu bahsda g‘alaba qozongan sportchi JCH medalini naqd qiladi.

Erkaklar o‘rtasida 74 kg. vaznda taekvondochimiz tonggi dasturda — Moldova va Filippin vakilini ikki raundda mag‘lub etgandi. Hozirgina u chorak final yo‘llanmasi uchun koreyalik Kang Je Gvongga qarshi juda qiyin va qiziqarli jang o‘tkazdi. Raqib birinchi bo‘limda 18-16 hisobida g‘alaba qozondi. Ikkinchi bo‘lim tugashiga 2 soniya qolganida ham hisobda ortda borayotgan Jasur so‘nggi soniyada g‘alaba zarbasini berdi va 7-6 hisobida g‘alaba qozonib, muvozanatni tikladi.

Jaysunov uchinchi bo‘limda o‘zining faolligi evaziga irodali g‘alabaga erishdi. Ayniqsa, hisob 6-6 bo‘lib turganida hamyurtimiz raqibning "stoyka" almashtirganidan unumli foydalanib, ikki marta protektor zarba berib, 4 ochko oldinga o‘tib oldi. Vatandoshimiz jang oxiriga qadar mazkur ustunlikni berib qo‘ymadi — 13-9.

Jasur Jaysunov yarim final yo‘llanmasi uchun avstraliyalik Leo Golubichga qarshi dayanga chiqadi.