"Barselona" yarim himoyachisi Frank Kessiening agenti ivuarlik futbolchi yozgi transfer oynasida jamoani tark etishga rozi bo‘lgani haqidagi xabarlarni rad etdi. Bu haqda jurnalist Xavi Migel tvitterda xabar berdi.

Oldinroq Kessie moliyaviy muammolar tufayli uni sotishga majbur bo‘lgan "Barselona"ni tark etishga tayyorligi xabar qilingandi. Ma’lum bo‘lishicha, "Inter" futbolchini o‘z safiga qo‘shib olmoqchi, futbolchining o‘zi esa Italiya klubida faoliyatini davom ettirishga qarshi emas.

26 yoshli Kessieni "Barselona" 30 million yevroga baholagani haqida ma’lumot bor edi. Ispan klubi murabbiylar shtabi uni qadrlaydi va yaxshi futbolchi deb biladi, ammo klub moliyaviy talablarga rioya qilish uchun futbolchilar bilan xayrlashishga majbur. Kessie “Barselona” safida 2022 yilning yozidan buyon to‘p suradi. 42 o‘yinda u 3 ta gol urdi va 3 ta golli uzatmani amalga oshirdi.