"Барселона" ярим ҳимоячиси Франк Кессиэнинг агенти ивуарлик футболчи ёзги трансфер ойнасида жамоани тарк этишга рози бўлгани ҳақидаги хабарларни рад этди. Бу ҳақда журналист Хави Мигель твиттерда хабар берди.
Олдинроқ Кессиэ молиявий муаммолар туфайли уни сотишга мажбур бўлган "Барселона"ни тарк этишга тайёрлиги хабар қилинганди. Маълум бўлишича, "Интер" футболчини ўз сафига қўшиб олмоқчи, футболчининг ўзи эса Италия клубида фаолиятини давом эттиришга қарши эмас.
26 ёшли Кессиэни "Барселона" 30 миллион еврога баҳолагани ҳақида маълумот бор эди. Испан клуби мураббийлар штаби уни қадрлайди ва яхши футболчи деб билади, аммо клуб молиявий талабларга риоя қилиш учун футболчилар билан хайрлашишга мажбур. Кессиэ “Барселона” сафида 2022 йилнинг ёзидан буён тўп суради. 42 ўйинда у 3 та гол урди ва 3 та голли узатмани амалга оширди.
