O‘zbekiston U23 terma jamoasi bosh murabbiyi Timur Kapadze Qirg‘izistonga qarshi bo‘lib o‘tgan o‘rtoqlik o‘yini (1:0) o‘z fikrlari bilan o‘rtoqlashdi.

"Bu o‘yin bizga kerak edi. Bu o‘yin orqali futbolchilarning holatini ko‘zdan kechirib oldik. Bu o‘yinga biz jismoniy yuklama olgan holda keldik. O‘yin esa yaxshi bo‘ldi. Bizda imkoniyatlar bo‘ldi, ko‘proq gol urishimiz mumkin edi. Shuningdek, bu o‘yin orqali ba’zi kamchiliklarimizni bilib oldim. Buning ustida ish olib boramiz.

Qirg‘iziston zich himoyalandi. Bunday himoyani yoriib o‘tish uchun esa mahorat va individual harakatlar kerak. Bugun shu narsa bizga biroz yetishmadi. Umuman olganda, yigitlar yaxshi harakat qilishdi.

Husayn Norchayev o‘z jamoasida ham anchadan beri o‘yinlarda ishtirok eta olmayapti. Hozir u tonusda emas. Uning imkoniyatlarini esa yaxshi bilamiz. U o‘ynashi kerak. O‘ynab tursa, yaxshi harakat qiladi va vaziyatlardan yaxshi foydaladi.

Tarkibni tekshirib olish uchun ham bugungidek o‘rtoqlik o‘yinlari kerak. Qaysi futbolchi o‘yin bo‘ladigan kun yaxshi formada bo‘lsa, o‘sha maydonga tushadi. Muhim o‘yinlarda esa eng munosib o‘yinchilar xizmatidan foydalanaman", — dedi Kapadze.