Asli malilik, Angliyaning “Vulverxempton Uonderers” klubi va Ispaniya terma jamoasi hujumchisi Adama Traore Ramazon oyida boshlangan xayriya ishlari tufayli hujjatli film mavzusiga aylandi, deb xabar bermoqda Express & Star.
O‘yinchiga bag‘ishlangan film "Adama Traore: Muqaddas oy" deb nomlangan.
Futbolchi bu yil Ramazon oyida Buyuk Britaniyadagi yotoqxonalar va mehmonxonalarda yashovchi qochqinlar huzuriga borib, ularga sovg‘alar ulashdi va o‘z tarixi bilan o‘rtoqlashdi. Adama Ispaniyaning eng noqulay hududlaridan birida malilik muhojirlar oilasida o‘sgan, ammo shunga qaramay, futbolda muvaffaqiyat qozona oldi.
Shuningdek, u oziq-ovqat tarqatuvchi joyda mahsulotlar uchun javonlar qurishda yordam berdi, boshqa ko‘ngillilar bilan uysizlarga oziq-ovqat tarqatdi va nogiron bolalarga futbol usullarini ko‘rsatdi.
Adama Traore o‘z vaqtini va pulini xayriya ishlariga sarflaydigan yagona musulmon sportchi emas. Bu yil “Bavariya”ning senegallik hujumchisi Sadio Mane Senegaldagi xayriya ishlari uchun Sokrat mukofotini oldi. "Liverpul" yulduzi, misrlik Muhammad Saloh esa Sunday Times nashrining saxiy insonlar reytingida 8-o‘rinni egalladi.
Shuni ham aytish lozimki, Adama Traore futbolchi bo‘lmaganda bemalol tarjimonlik bilan kun kechirsa ham bo‘lardi: u 6 ta tilni biladi.
