Ma’lum qilganimizdek, bugun butun Respublikamiz bo‘ylab 23 iyun – Xalqaro Olimpiya kuni hamda 30 iyun Yoshlar kuniga bag‘ishlangan “Yangi nafas” ommaviy yugurish musobaqasi o‘tkazildi. Yurtimizning 16 shahrini qamrab olgan ushbu tadbirning Toshkent shahridagi bahslari ham yuqori saviyada tashkil etildi.
Musobaqaning ochilish marosimida O‘zbekiston Respublikasi Prezidenti huzuridagi xavfsizlik kengashi, O‘zbekiston Respublikasi Vazirlar Mahkamasi, Yoshlar siyosati va sport vazirligi, Ichki ishlar vazirligi, Milliy Olimpiya qo‘mitasi mutasaddilari ishtirok etishdi.
Marosimda so‘z olgan rasmiylar mamlakatimizda yosh avlodning bugungi kunda sport bilan shug‘ullanishlari uchun yaratilayotgan sharoitlar, Prezidentimiz tomonidan bu borada olib borilayotgan islohotlar haqida to‘xtalib o‘tishdi. Shuningdek, tadbir davomida Xalqaro Olimpiya qo‘mitasi Prezidenti Tomas Baxning Olimpiya kuni munosabati bilan yo‘llagan bayram tabrigi ham qo‘yib berildi.