Londonning "Chelsi" klubi belgiyalik hujumchi Romelu Lukakuning klub safiga qaytish sanasini o‘zgartirdi.

Endilikda, agar hujumchi "Inter"ga o‘tmasa, u mashg‘ulotlarni 12 iyuldan emas, balki 17 iyuldan boshlashi kerak, deb yozmoqda Daily Telegraph nashri.

Manba bergan xabarga ko‘ra, har ikki tomon futbolchining Italiya klubiga o‘tishi 17 iyulgacha kelishib olinishini kutishmoqda.

Avvalroq Lukaku londonliklar bilan mashg‘ulotlarni rejalashtirilgan sana — 12 iyulda davom ettirish niyatida emasligi xabar qilingandi, garchi "Chelsi" bosh murabbiyi Maurisio Pochettino futbolchini 12 yoki 13 iyulda "ko‘klar" bazasida paydo bo‘lishini kutgan bo‘lsa ham.

Eslatib o‘tamiz, Lukaku 2022/2023 yilgi mavsumni "Inter"da ijara asosida o‘tkazgan. 2019/2020 va 2020/2021 yilgi mavsumlarda u "Chelsi"ga o‘tishdan oldin "neradzurrilar"da o‘ynagan.