"Benfika" "Manchester Yunayted"ning hujumchi Gonsalu Ramush borasidagi taklifini rad etdi.
CaughtOffside xabariga ko‘ra, "qizil iblislar" pul tovonidan tashqari, braziliyalik himoyachi Aleks Tellesning Lissabon klubiga o‘tishini ham transferga qo‘shmoqchi bo‘lgan. "Manchester Yunayted" 22 yoshli Ramush bo‘yicha "Benfika"ga yana bir taklif kiritadimi yoki yo‘qmi hozircha aniq emas, ammo ma’lumotlarga ko‘ra, "Manchester Yunayted" kelishuvga qo‘shmoqchi bo‘lgan Telles faoliyatini "Portu"da davom ettirish variantini afzal ko‘radi.
Avvalroq, "PSJ" Ramushning transferi uchun 55 million yevro to‘lashga tayyorligi xabar qilingandi.
2022/23 yilgi mavsumda hujumchi "burgutlar" safida barcha musobaqalarda 47 ta o‘yinda maydonga tushib, 27 ta gol urdi va 12 ta golli uzatmani amalga oshirdi. Uning shartnomasi 2025 yilning yoziga qadar mo‘ljallangan.