«Manchester Siti» yarim himoyachisi Tijani Reynders yozgi transfer oynasida klubni tark etishi mumkin. Niderlandiyalik futbolchi «shaharliklar»ning asosiy tarkibidagi joyini yo‘qotdi, shu sababli matbuotda uning sotilishi haqidagi xabarlar tez-tez paydo bo‘lmoqda.
Transfer News Live nashrining El Nacional’ga tayanib xabar berishicha, maydon markazini kuchaytirish istagida bo‘lgan Madridning «Real» klubi 27 yoshli futbolchiga asosiy da’vogarlardan biri bo‘lib turibdi. Ingliz grandi xavbek uchun taxminan 58 million yevro talab qilishi kutilmoqda.
Tijani Reynders joriy mavsumda Xosep Gvardiola jamoasi safida 45 ta o‘yinda maydonga tushib, 7 ta gol urdi va 8 ta golli uzatmani amalga oshirdi. Eslatib o‘tamiz, o‘tgan yilning yozida «Manchester Siti» ushbu futbolchini «Milan»dan qariyb 55 million yevro evaziga sotib olgan edi.
