Portugaliyaning “Portu” klubi eronlik hujumchi Mehdi Taremi bilan xayrlashishga tayyor ekanliklarini ma’lum qildi.
Sky Italia xabariga ko‘ra, "ajdarlar" kamida 25 million yevro evaziga 30 yoshli futbolchi bilan xayrlashishga tayyor. Avvalroq, "ko‘k-oqlar" hujumchining transfer qiymati 18 million yevroga baholanganiga qaramay, kamida 20 million yevro ishlab olmoqchi ekani haqida ma’lumotlar paydo bo‘lgandi.
Ma’lum bo‘lishicha, futbolchiga birdaniga bir shaharning ikki klubi "Inter" va "Milan" qiziqish bildirmoqda.
Mehdi Taremi 2020 yildan buyon “Portu” jamoasida o‘ynab kelmoqda va shu vaqt ichida u Portugaliya chempioni, Superkubok sohibi va ikki karra mamlakat kubogi sohibi bo‘lishga muvaffaq bo‘ldi.