Braziliya futboli bosh yulduzi Neymar shaxsiy uy qurilishida qoidalardan chetga chiqqani va bu bilan tabiatga zarar yetkazgani uchun katta miqdorda jarimaga tortildi.

Gap 16 million real (3,3 mln. dollar) haqida ketmoqda. Ta’kidlanishicha, Braziliyada hali hech kim bu darajada katta jarima to‘lamagan ekan.

Keyingi faoliyati masalasida hali yakuniy to‘xtamga kelmagan «PSJ» hujumchisi ekologiya muhofazasiga doir chamasi 10ta qonunni buzganlikda ayblandi. Aniqrog‘i, Braziliya milliy jamoasi yulduzi Rio-de-Janeyro tevaragida joylashgan Mangaratiba shahrida qad ko‘targan koshonasi hududida sun’iy ko‘l barpo etishda sohil tabiatini asrashga qaratilgan bir qator qonunlardan chetga chiqqan. Sky News xabariga qaraganda, 31 yoshli hujumchiga nisbatan jiddiy moliyaviy chora ko‘rish tashabbusi Braziliya hukumatidan chiqqan. Muhokamalar yakunida ko‘pchilik 16 million real (3,3 mln. dollar yoxud 2,6 million funt sterling) miqdorida jarima belgilashni yoqlagan.

Hozircha Neymarning o‘zi bunga qandaydir izoh bergani yo‘q. Futbolchining advokatlari ham sukut saqlashmoqda. Mangaratiba meriyasi bayonotida qayd etilishicha esa, futbolchi hashamatli koshonasida ko‘l barpo etishda ekologiya qonunlariga mutlaqo befarq qaragan. Ayblovlar esa chindan ham, ancha jiddiy: daryo o‘zanini burish, toshlarni siljitish, plyaj qurilishi uchun ruxsat etilmagan joydan qum olish, noqonuniy yer qazish, mavjud o‘simliklarni yo‘q qilish va hokazo... Shu tariqa qurilish ishlari to‘xtatib qo‘yildi. Qo‘shimcha qilinishicha, Neymar ko‘l loyihasiga chamasi 120 ming real (25 ming dollar) sarflashga ulgurgandi.