Superliga 15-turi doirasida “Navbahor” safarda “Metallurg” mehmoni bo‘ladi.

Mazkur jamoalar Superliga (oliy liga)da shu kungacha 53 marotaba o‘zaro ro‘baro‘ kelishgan. O‘tkazilgan o‘yinlarning  24 tasida “lochinlar” g‘alaba qozonishgan bo‘lsa, 13 ta uchrashuvda bekobodliklar zafar quchishgan, 16 ta bahsda esa jamoalar durangga imzo chekishgan.

To‘plar nisbatidagi ustunlik jamoamiz tomonida: 76 ga 51.

O‘zaro o‘yinlarda namanganliklar 88 ochko, bekobodliklar esa 55 ochkoni qo‘lga kiritishgan.

“Navbahor”ning “Metallurg” ustidan qozongan eng yirik g‘alabasi 7:0 ga teng bo‘lsa, bekobodliklarning namanganliklar ustidan erishgan eng yirik g‘alabasi – 5:1.

Ushbu klublarning 1-davrada Namanganda bo‘lib o‘tgan uchrashuvida "Navbahor" yirik – 3:0 hisobida g‘alaba qozongan, gollarga Jamshid Boltaboyev (38), Jasurbek Yaxshiboyev (42) va Jamshid Iskanderov (90+2) mualliflik qilishgandi.

Eslatib o‘tamiz, “Metallurg” – “Navbahor” bahsi 4 avgust kuni Bekobod shahridagi “Metallurg” stadionida soat 20:00 da start oladi.

“Navbahor” PFK matbuot xizmati.