O‘zbekiston milliy terma jamoasi va "Nasaf" klubi himoyachisi Husniddin Aliqulov faoliyatini Turkiyaning «Rizespor» klubida davom ettiradi.

«Dastlab sizlarga katta rahmat aytmoqchiman! «Nasaf»da baxtli edim, g‘alabada ham, mag‘lubiyatda ham birga bo‘ldingiz.

Har daqiqa sizlarning qo‘llab-quvvatlashlaringizni his etib turdim. Jamoani shunday tarzda qo‘llashda davom etishingizni so‘rab qolardim. Zero «Nasaf» sizlar uchun o‘ynaydi!

Fursatdan foydalanib «Nasaf»dagi barchaga, rahbariyatdan tortib, klubdagi barcha xodimlarga, muxlislarga katta rahmat aytaman!

O‘z navbatida Ro‘ziqul Sa’dullayevich Berdiyevga alohida minnatdorchiligimni bildirmoqchiman. Har bir o‘yinda bosh murabbiyning ishonchini oqlash uchun maydonga tushdim va klub uchun borimni berdim.

O‘z o‘yinim va gollarim bilan jamoa g‘alabalariga oz bo‘lsa ham hissa qo‘shganimdan faxrlanaman. «Nasaf»dagi faoliyatim yakunlandi, sababi professional faoliyatimda oldinga intilish vaqti yetib keldi. Barcha futbolchilar singari men ham o‘zimni legioner sifatida sinab ko‘rishni xohladim.

To‘g‘ri oldimda Osiyoning bir qator klublaridan takliflar bor edi. Ammo professional futbolchi sifatida yanada o‘sish uchun Yevropa futbolida o‘ynashni to‘g‘ri deb bildim. Turkiya Superligasida yurtimiz sharafini munosib himoya qilishga, maydonda oxirgi kuchim qolguncha o‘ynashga va’da beraman.

Shuni unutmangki, men doim «Nasaf» muxlisi bo‘lib qolaman» - dedi futbolchi.