«Manchester Yunayted» Maykl Kerrikni jamoa boshqaruvida qoldirishga tayyor.

44 yoshli mutaxassis Ruben Amorim iste’foga chiqarilganidan so‘ng, mankunianliklar bosh murabbiyi vazifasini vaqtincha bajaruvchi etib tayinlangan edi. Uning amaldagi shartnomasi shu mavsum yakuniga qadar mo‘ljallangan.

The Guardian nashrining xabar berishicha, «Yunayted» rahbariyati Kerrik bilan uning kelajagi borasida hali muzokaralar olib bormagan edi. Chunki rahbariyat avval uning jamoani Chempionlar ligasiga olib chiqa olishiga ishonch hosil qilishni istagan. Yakshanba kuni «Liverpul» ustidan qozonilgan g‘alaba (3:2) klubga mavsum yakunlariga ko‘ra APLning kuchli beshligidan joy olishni kafolatladi.

Endi «Manchester Yunayted» Kerrikka doimiy asosda bosh murabbiy bo‘lishni taklif qilishi kutilmoqda. Klub bosh direktori Omar Berrada va sport direktori Jeyson Uilkoks uning ishidan mamnun va futbolchilar ham uni qo‘llab-quvvatlashini yaxshi bilishadi.

Xususan, Brunu Fernandesh va Xarri Maguayr kabi yetakchi futbolchilar Mayklning klubda qolishi tarafdori bo‘lib turishibdi.

Hozirda «Manchester Yunayted» APL turnir jadvalida 35 turdan so‘ng 64 ochko jamg‘argan holda 3-o‘rinni egallab turibdi.