«Arsenal»ning braziliyalik hujumchisi Gabriel Jezus va ukrainalik himoyachisi Aleksandr Zinchenko klub televideniyesiga birga intervyu berish chog‘i yo‘q joydan chiroyli hazil uchun mavzu topishdi.
Bunda ikkinchisi klubdoshi hazilidan biroz hayratga tushdi, lekin yakunda «javob» zarbasi yo‘llash imkoniyatini qo‘ldan chiqarmadi.
Futbolchilardan suhbat jarayonida bir-birlariga taalluqli savollarga tezkor javob qaytarish talab etildi. Muayyan pallada ko‘chadan sirena tovushi eshitildi va braziliyalik bunga darhol reaksiya bildirdi: «Qara, bu taksi sen uchun keldi». Jezus shu luqmadan keyin kulib yubordi, Zinchenko ham, faqat biroz hayratlangan holda. Ehtimol, Gabriel «Tez yordam» mashinasi sirenasini nazarda tutib, Aleksandrning tez-tez jarohatlanishiga ishora qilgandir. Har holda, himoyachi mushaklarga bog‘liq muammolar tufayli «Arsenal»ning AQSH bo‘ylab mavsumoldi turnesidan o‘rin olgan biror o‘yinida maydonga tushmadi. Qolaversa, London klubi safiga avvalgi yoz qo‘shilgan Zinchenko shundan buyon 17ta rasmiy o‘yinni o‘tkazib yubordi.
Asosiysi, ukrainalik futbolchi tezda javob hazili uchun imkon topdi. Ya’ni muxbir undan o‘tgan mavsum Jezus darvozasini ishg‘ol qilgan 3ta raqib jamoani sanab berishini so‘ragach, lo‘ndagina javob qaytardi: «Vulverxempton», bori shu...». U shu tariqa braziliyalik hujumchi London klubidagi debyut mavsumida kutilgan mahsuldorlik ko‘rsatolmaganiga ishora qildi.
Darvoqe...
Gabriel Jezusning o‘zi kichik jarrohlik amaliyoti ortidan bir necha hafta chetda qoladigan bo‘ldi. Braziliyalik futbolchi jumladan, 6 avgust kuni Angliya superkubogi uchun «Manchester Siti»ga qarshi kechgan bahsda Mikel Arteta jamoasiga yordam berolmadi. Uning 11 avgust kuni boshlanadigan APL-2023/2024 doirasidagi ilk turlarda ham tomoshabin maqomida qolishi aniq.
