Terma jamoada muvaffaqiyatga erishgan Leoning Yevropada mavsum o‘yinchisi bo‘lish uchun nomzodlar orasiga kirgani ko‘pgina bahs va munozaralarga sabab bo‘ldi.

UYEFA ekspertlari qaroriga ko‘ra, Messi boshqa ehtimoliy nomzodlar, jumladan, YECHL finalida gol urgan «Manchester Siti» a’zosi Rodridan oldinda bo‘lishiga sabab bor. Bu yerda uning JCH-2022dagi yutuqlari inobatga olingan.

Messi 1986 yildan beri birinchi marta Argentina terma jamoasini jahon chempionligiga olib chiqdi va UYEFA bu uning kuchli uchlikka kirishiga sabab bo‘lganini ta’kidladi.

«Messi zerikarli tuyulgan ichki ligani chempionlikda yakunladi. Biroq uning ushbu ro‘yxatda kuchli uchlikka kirishiga Argentina terma jamoasi bilan Jahon chempionatida ko‘rsatgan mardonavorligi sabab bo‘ldi.

U 7 ta o‘yinda 10 ta golda ishtirok etdi. YECHL va Liga 1da ham xuddi shunday jozibador raqamlarni qayd etdi, bu yerda u ikkala musobaqada 39 ta o‘yinda qatnashib, 40 ta golga sababchi bo‘ldi», – deyiladi bayonotda.