Терма жамоада муваффақиятга эришган Леонинг Европада мавсум ўйинчиси бўлиш учун номзодлар орасига киргани кўпгина баҳс ва мунозараларга сабаб бўлди.

УЕФА экспертлари қарорига кўра, Месси бошқа эҳтимолий номзодлар, жумладан, ЕЧЛ финалида гол урган «Манчестер Сити» аъзоси Родридан олдинда бўлишига сабаб бор. Бу ерда унинг ЖЧ-2022даги ютуқлари инобатга олинган.

Месси 1986 йилдан бери биринчи марта Аргентина терма жамоасини жаҳон чемпионлигига олиб чиқди ва УЕФА бу унинг кучли учликка киришига сабаб бўлганини таъкидлади.

«Месси зерикарли туюлган ички лигани чемпионликда якунлади. Бироқ унинг ушбу рўйхатда кучли учликка киришига Аргентина терма жамоаси билан Жаҳон чемпионатида кўрсатган мардонаворлиги сабаб бўлди.

У 7 та ўйинда 10 та голда иштирок этди. ЕЧЛ ва Лига 1да ҳам худди шундай жозибадор рақамларни қайд этди, бу ерда у иккала мусобақада 39 та ўйинда қатнашиб, 40 та голга сабабчи бўлди», – дейилади баёнотда.