Xabaringiz bor, "Navbahor" Osiyo Chempionlar Ligasi (OCHL) saralash bosqichi doirasida safarda “Al-Vakra”ga qarshi maydonga tushadi.

“Lochinlar” bugun o‘tkaziladigan bahsga Doxada astoydil tayyorgarlik ko‘rishdi.

Bo‘lajak o‘yin arafasida jamoaning yetakchi futbolchisi, tajribali  yarim himoyachi Jamshid Iskanderovdan klub matbuot xizmati intervyu oldi.

- Jamshid, bugungi bahsga tayyorgarlik qanday kechdi?

- Assalomu alaykum! Bo‘lajak o‘yinga jiddiy tarzda tayyorgarlik ko‘rish maqsadida, 19 avgust kuni Doxaga yetib keldik va mashg‘ulotlar o‘tkazdik. Bugungi bahs oldidan biz – futbolchilarning kayfiyatimiz a’lo darajada.

“Al-Vakra”ga qarshi kechadigan o‘yinda maydonga g‘alaba ishtiyoqida tushib, “Navbahor” muxlislariga quvonch ulashishga harakat qilamiz hamda buni amalga oshirish uchun barcha imkoniyatlarimizni ishga solamiz. 

- Bo‘lajak raqib – “Al-Vakra” borasida nima deya olasiz?

- “Al-Vakra”da mahoratli futbolchilar to‘p tepishi, tarkibi kuchli legionerlarga ega ekanligidan xabarimiz bor. Bo‘lajak raqibning o‘yin uslubini yaxshi o‘rgandik va bugungi bahsda murabbiylarimizning ko‘rsatmalarini maydonda to‘liq amalga oshirish, zafar quchishga intilamiz.           

“Al-Vakra” ustidan g‘alaba qozonib, OCHL guruh o‘yinlari yo‘llanmasini qo‘lga kiritsak, “Navbahor” tarixidan munosib joy olamiz. Buni har birimiz tushunib turibmiz hamda zafar quchish uchun maydonda bor kuchimizni sarflaymiz.  

Maqsadimiz – “Navbahor” ishqibozlarini g‘alaba bilan xursand etish.

Umid qilamizki, Doxaga yetib kelgan muxlislar bugungi o‘yinda ham jamoamizni munosib tarzda qo‘llab-quvvatlab, biz – futbolchilarga qo‘shimcha kuch va ruh bag‘ishlashadi.