«Navbahor» klubi bosh murabbiyi Samvel Babayan Osiyo chempionlar ligasi saralash bosqichi doirasida bo‘lib o‘tgan «Al-Vakra»ga qarshi o‘yindan so‘ng o‘z fikrlari bilan o‘rtoqlashdi.

— "Navbahor" futbol klubi uchun tarixiy o‘yin bo‘ldi. Jamoa 23 yildan buyon qit’a miqyosida musobaqalarda ishtirok etmayotgandi. Biz Chempionlar ligasida saralash bosqichi bilan cheklanib qolmasdan, avvalo guruh bosqichiga chiqishni, OCHL madhiyasi bizning maydonda ham yangrashini, muxlislarimizga ulkan quvonch ulashishni istagandik. Ishqibozlarimiz biz bilan faxrlanishlari uchun qo‘limizdan kelgan barcha ishni qildik. Bugun o‘z joriy mavsumda o‘z oldimizga qo‘ygan maqsadlardan biriga erishdik. Ammo bu bilan cheklanib qolmoqchi emasmiz. Keyingi har bir o‘yin biz uchun eng muhimi hisoblanadi.

Murabbiylik faoliyatim davomida, nazarimda, ushbu musobaqada eng ko‘p qatnashgan mutaxassis hisoblanaman. Ushbu tajribamdan kelib chiqib bugun maqsadga erishish o‘ta muhim ahamiyatga ega edi. Men o‘z jamoam bilan Chempionlar ligasida 2 marta yarim finalgacha yetib borganman.

Aytib o‘tganimdek, guruh bosqichiga chiqish vazifasini udalladik. Endi guruhdan keyingi bosqichga o‘tishga harakat qilamiz.

O‘yindan oldingi matbuot anjumanida aytib o‘tganimdek, "Al-Vakra" juda yaxshi jamoa. Uning tarkibida tajribali futbolchilar va kuchli mutaxassislar yig‘ilgan.

Mazkur o‘yinga shunday strategiya tanlagan edik-ki, o‘z ustunligimizni namoyish etgan holda raqibning kamchiligidan foydalanishmiz zarur edi. Biz bunga erishdik. Ammo o‘z maqsadimizga o‘yinning asosiy vaqtida erishishni ko‘zlagandik.

Bizni qo‘llab-quvvatlash uchun Qatarga kelgan har bir muxlisga minnatdorchilik bildiraman. Biz maydonga o‘z ishqibozlarimizni xursand etish uchun, ular biz bilan faxrlanishlari uchun chiqamiz. Biz ayni paytda barcha 3 ta musobaqada g‘oliblik uchun kurashayotgan O‘zbekistondagi yagona klubmiz", — dedi Babayan.