Angliya futboli, xususan, APL afsonasi Alan Shirer «Tottenxem» goleadori Xarri Keynning «Bavariya»ga yo‘l olganidan rosa xursand.

Har holda, sobiq hujumchi uzoq kutilgan transfer rasmiylashtirilishidan oldin bunga hazilaralash lo‘ndagina munosabat bildirdi: «Garri, ketish fursati yetdi».

Diqqatni tortadigan tomoni, Alan Shirer «Tvitter»dagi sahifasiga joylagan ushbu munosabatiga o‘zining samolyot uchuvchisi obrazidagi suratini ham qo‘shdi. Ajoyib reaksiya. Gap shundaki, APL o‘yinlarida jami 260ta gol urgan «Nyukasl»ning sobiq hujumchisi chempionat tarixidagi eng yaxshi to‘purar hisoblanadi. Keyn hisobida esa 213ta gol bor va 2-o‘rinda.

Ha, «Tottenxem» goleadori APLda o‘ynashda davom etganida, Alan Shirerning rekordi xavf ostida qolardi. Sobiq goleador ehtimol, shuning uchun ham eng yaqin ta’qibchisini tezroq kuzatib qo‘yishni istagandir. Mana, Xarri ketdi, endi Shirer yengil nafas olsa bo‘laveradi.

APL TARIXIDAGI ENG YAXSHI TO‘PURARLAR

1. Alan Shirer («Blekbern», «Nyukasl») - 260ta gol

2. Xarri Keyn («Tottenxem») - 213ta gol

3. Ueyn Runi («Everton», «MYU») - 208ta gol

4. Endi Koul («Nyukasl», «MYU», «Blekbern», «Fulxem», «Manchester Siti», «Portsmut») - 187ta gol

5. Serxio Aguero («Manchester Siti») - 184ta gol