Ispaniya Qirollik futbol federasiyasi bosh kotibi Andreu Kamps Yevropa futbol assosiasiyalari ittifoqiga (UYEFA) tashkilotning faoliyatini to‘xtatgan rahbari Luis Rubiales bilan bog‘liq mojarodan so‘ng Ispaniya hukumati assosiasiya ishlariga aralashgani yuzasidan shikoyat bilan murojaat qildi. Bu haqda Onda Cero xabar bermoqda.
Manba bergan xabarga ko‘ra, Kamps Ispaniya hukumati a’zolarini Rubialesni iste’foga chiqishga ommaviy chaqirishda ayblaydi va UYEFAdan tegishli choralar ko‘rishni talab qiladi. Avvalroq vise-prezident Yolanda Dias, Madaniyat va sport vaziri Mikel Iseta va Oliy sport kengashi prezidenti Viktor Frankos Rubialesni lavozimidan chetlatish talablarini ilgari surgan edi.
UYEFA nizomiga ko‘ra, assosiasiyalar o‘z ishlarini uchinchi tomonlarning ta’sirisiz boshqarishi kerak. Aks holda, Yevropa futbol assosiasiyalari ittifoqi tashkilot a’zoligini to‘xtatib qo‘yish, shuningdek, klublarni Yevropa musobaqalari va milliy terma jamoani Yevropa chempionatidan chetlashtirishga haqli.
Eslatib o‘tamiz, Avstraliya va Yangi Zelandiyada bo‘lib o‘tgan jahon chempionati g‘oliblarini taqdirlash marosimida Rubiales Ispaniya terma jamoasi futbolchisi Jennifer Ermosoni quchoqlab, lablaridan o‘pgan edi. Keyinroq Xalqaro futbol federasiyasi (FIFA) Rubialesga nisbatan intizomiy ish ochdi.
