Испания Қироллик футбол федерацияси бош котиби Андреу Кампс Европа футбол ассоциациялари иттифоқига (УЕФА) ташкилотнинг фаолиятини тўхтатган раҳбари Луис Рубиалес билан боғлиқ можародан сўнг Испания ҳукумати ассоциация ишларига аралашгани юзасидан шикоят билан мурожаат қилди. Бу ҳақда Onda Cero хабар бермоқда.

Манба берган хабарга кўра, Кампс Испания ҳукумати аъзоларини Рубиалесни истеъфога чиқишга оммавий чақиришда айблайди ва УЕФАдан тегишли чоралар кўришни талаб қилади. Аввалроқ вице-президент Йоланда Диас, Маданият ва спорт вазири Микель Исета ва Олий спорт кенгаши президенти Виктор Франкос Рубиалесни лавозимидан четлатиш талабларини илгари сурган эди.

УЕФА низомига кўра, ассоциациялар ўз ишларини учинчи томонларнинг таъсирисиз бошқариши керак. Акс ҳолда, Европа футбол ассоциациялари иттифоқи ташкилот аъзолигини тўхтатиб қўйиш, шунингдек, клубларни Европа мусобақалари ва миллий терма жамоани Европа чемпионатидан четлаштиришга ҳақли.

Эслатиб ўтамиз, Австралия ва Янги Зеландияда бўлиб ўтган жаҳон чемпионати ғолибларини тақдирлаш маросимида Рубиалес Испания терма жамоаси футболчиси Женнифер Эрмосони қучоқлаб, лабларидан ўпган эди. Кейинроқ Халқаро футбол федерацияси (ФИФА) Рубиалесга нисбатан интизомий иш очди.