O‘zbekiston milliy terma jamoasi yetakchilaridan biri Jaloliddin Masharipov o‘z sport formasini saqlab turish maqsadida "Paxtakor" tarkibida mashg‘ulotlarda ishtirok etayotgan edi. Turkiyadan bir nechta takliflar bo‘lishiga qaramasdan, "Paxtakor" rahbariyati Masharipovni tarkibga qo‘shib olish uchun jiddiy urinish amalga oshirgan.

FIFAning "Futbolchilarning maqomi va transferi" haqidagi Nizomiga ko‘ra, futbolchi transfer oynasi yopilgunga qadar erkin agentga aylangan bo‘lsa, transfer oynasi yopilganidan keyin ham klub bilan shartnoma imzolashi mumkin. Shu banddan foydalangan holda "Paxtakor" Masharipovni o‘z safiga qo‘shib olmoqchi edi.

Ammo, Masharipov "Al Nassr" bilan shartnomani O‘zbekistondagi transfer oynasi yopilganidan keyin bekor qilgani tufayli, transfer amalga oshgan  taqdirda ham, FIFA bu transferni ro‘yxatdan o‘tkazmagan bo‘lar edi.

Shu sababdan futbolchimiz endi asosiy e’tiborini turk klublaridan kelib tushayotgan takliflarni ko‘rib chiqishga qaratadi.