Ertaga O‘zbekiston U-23 terma jamoasi Parij-2024 Olimpiadasi yo‘lida o‘z yurishini boshlaydi. Parijga yetib borish uchun Timur Kapadze Toshkentdagi saralash bosqichida ijobiy natija qayd etishi talab etiladi. Kichik turnir oldidan matbuot anjumani bo‘lib o‘tdi. Uning ikkinchi qismida Eron U-23 jamoasi bosh murabbiyi Rizo Enoyati o‘z fikrlarini bildirdi.
«Barchaga salom. Bu yerda ekanimizdan xursandmiz. Mehmondo‘stlik uchun alohida rahmat. Juda ham qiyin bahslar bizni kutib turibdi. Birinchi uchrashuv Gonkongga qarshi bo‘lib o‘tadi. Birinchi o‘yin hamma uchun ancha mas’uliyatli. Biroq maqsadga erishish uchun bor imkoniyatimizni ishga solamiz. Barcha futbolchilarni tayyor holatda deb ayta olaman. Qadam-ba qadam barcha rejalarni amalga oshirib boramiz. Barcha jamoalar uchun maxsus rejalarimiz mavjud. Hozir gonkongga e’tibor qaratganmiz. Boshqa narsalar haqida o‘ylashning vaqti emas.
Bu musobaqa nafaqat o‘yinchilar uchun, balki hukumat uchun ham muhim. Futbolchilar Olimpiadaga yo‘llanmani qo‘lga kiritsa, harbiy xizmatdan ozod bo‘lishi rost. Biroq harbiy xizmatdan ko‘ra olimpiada muhimroq. Hukumat shu paytgacha bizni yaxshi qo‘llab quvvatlamoqda. Yigitlar butun turnir davomida borini beradi.
Hozircha katta muammo - Gonkong biz uchun noma’lum raqib. Ularni hali analiz qilishga ulgurmadik. Taktikasini to‘liq ocholmadik. Biroq ertangi o‘yinda tayyormiz. Ertangi bahsda hech qanaqa syurprizlar bo‘lmaydi», – dedi murabbiy.
