Эртага Ўзбекистон U-23 терма жамоаси Париж-2024 Олимпиадаси йўлида ўз юришини бошлайди. Парижга етиб бориш учун Тимур Кападзе Тошкентдаги саралаш босқичида ижобий натижа қайд этиши талаб этилади. Кичик турнир олдидан матбуот анжумани бўлиб ўтди. Унинг иккинчи қисмида Эрон U-23 жамоаси бош мураббийи Ризо Энояти ўз фикрларини билдирди.
«Барчага салом. Бу ерда эканимиздан хурсандмиз. Меҳмондўстлик учун алоҳида раҳмат. Жуда ҳам қийин баҳслар бизни кутиб турибди. Биринчи учрашув Гонконгга қарши бўлиб ўтади. Биринчи ўйин ҳамма учун анча масъулиятли. Бироқ мақсадга эришиш учун бор имкониятимизни ишга соламиз. Барча футболчиларни тайёр ҳолатда деб айта оламан. Қадам-ба қадам барча режаларни амалга ошириб борамиз. Барча жамоалар учун махсус режаларимиз мавжуд. Ҳозир гонконгга эътибор қаратганмиз. Бошқа нарсалар ҳақида ўйлашнинг вақти эмас.
Бу мусобақа нафақат ўйинчилар учун, балки ҳукумат учун ҳам муҳим. Футболчилар Олимпиадага йўлланмани қўлга киритса, ҳарбий хизматдан озод бўлиши рост. Бироқ ҳарбий хизматдан кўра олимпиада муҳимроқ. Ҳукумат шу пайтгача бизни яхши қўллаб қувватламоқда. Йигитлар бутун турнир давомида борини беради.
Ҳозирча катта муаммо - Гонконг биз учун номаълум рақиб. Уларни ҳали анализ қилишга улгурмадик. Тактикасини тўлиқ очолмадик. Бироқ эртанги ўйинда тайёрмиз. Эртанги баҳсда ҳеч қанақа сюрпризлар бўлмайди», – деди мураббий.
