Biroz oldin O‘zbekiston hamda Eron U-23 jamoalari o‘rtasida Osiyo kubogi saralashi bo‘lib o‘tdi (1:0).

Bahsdan so‘ng matbuot anjumani tashkil etildi hamda uning birinchi qismida eronliklar ustozi Rizo Enoyati ishtirok etdi.

«Avvalambor, O‘zbekistonni g‘alaba bilan tabriklayman. Ularda ko‘p imkoniyatlar bo‘ldi. Ba’zi rejalarimiz o‘xshamadi. Durang ikki jamoa uchun ham yaxshi natija edi. Biroq raqib g‘alaba qozondi, bu futbol. Yigitlar ko‘rsatmalarimni amalga oshira olmadi. 

Osiyo o‘yinlarida boshqa o‘yinchilarga ham imkon beriladi. Ularning potensialini bilib olish kerak. U musobaqaga maksimal kuchni beramiz. Eron chempionatida muammoli holatlar ko‘p. Shu sababli ikkita o‘yinchi olishga majburmiz, uchta emas», - dedi murabbiy.

Matbuot anjumanining ikkinchi qismida Temur Kapadze ishtirok etdi. 

«Hammani g‘alaba bilan tabriklayman. Muxlislarning qo‘llab-quvvatlashi ancha kuch berdi.  Ularning madadini so‘nggi soniyagacha sezib turdik. Afg‘oniston va Gong Kong bilan oson o‘yinlar bo‘ldi, biroq Eronning kuchliroq ekani aniq edi. Shunday bo‘lishiga qaramay ularga umuman imkon berilmadi. 1:0 biroz tahlika bilan o‘ynashga majbur qildi. Biroq hech kim e’tiborni susaytirmadi. Endi bor e’tiborni boshqa rakursga qaratamiz. Osiyo o‘yinlariga tayyorgarlikni  boshlaymiz. Biroq u yerda legionerlardan foydalanmoqchi emasmiz. Ayni damda klublardagi futbolchilarga ishonamiz. Imkoniyat kam berilayotgan bolalar bilan ko‘proq ishlashga harakat qilamiz. Butun o‘zbek futbolini qiyin taqvim kutib turibdi. Turli musobaqalar bor. Biroq «Nasaf» va «Paxtakor» murabbiylari bilan gaplashamiz. Bunday og‘ir paytda termaga imkon berish yaxshiroq variant», – dedi Kapadze.