«Barselona» bosh murabbiyi Xavining aytishicha, "ko‘k-anorranglilar" Yevropa chempionlar ligasida g‘olib chiqish uchun Xosep Gvardiolaga ko‘p vaqt bermagan bo‘lardi.
«Bu yerdagi insonlar u qadar sabrli emas. «Barselona» va «Manchester Siti» o‘rtasida hech qanday umumiylik yo‘q. Pep buni yaxshi biladi va klublar qanday talablarni qo‘yishini tushunadi.
Siz mendan g‘alabalar talab qilyapsiz. G‘alabalar — yaxshi o‘yin mahsuli ekanini tushunaman, ammo biz o‘tgan mavsumda «Bavariya»ga qarshi ajoyib o‘yin o‘tkazib, 0:2 hisobida yutqazgandik. O‘shanda siz menga muhimi natija ekanini aytgandingiz. "Barsa" boshqa klublarda bo‘lgani kabi sovrinlarni uzoq kutishni istamaydi», – dedi Xavi.
Eslatib o‘tamiz, Xosep Gvardiola «Manchester Siti» boshqaruvidagi yettinchi mavsumida Chempionlar ligasi sovrinini qo‘lga kiritdi. U «Barselona» boshqaruvidagi 4 mavsumda YECHLda 2 marta g‘olib chiqqandi.