"Liverpul" afsonasi Stiven Jerrard o‘z klubida uzoq qolmaganidan va Yurgen Klopp qo‘l ostida o‘ynamaganidan afsusda.
O‘z vaqtida Jerrardga 2015/16 yilgi mavsum uchun "Liverpul" bilan shartnomasini uzaytirish taklif qilingan edi, biroq Stiven bunga rozi bo‘lmadi va MLSda "LA Gelaksi"ga o‘tishni afzal ko‘rdi.
Jerrard shunday qarorga kelgan, chunki o‘sha paytda "qizillar" bosh murabbiyi bo‘lgan Brendan Rojers Stivenni asosiy tarkib futbolchisi deb hisoblamagan.
Biroq, 2015 yilning oktyabr oyida "Liverpul" Rojersni iste’foga chiqardi va to‘rt kundan so‘ng Kloppni tayinladi, bu esa keyinchalik Jerrardni nemis murabbiyi bilan ishlash imkoniyatidan afsusda qoldirdi.
"Men xafa bo‘lganman. Ma’lumki, men shartnomamni bir yilga uzaytirmaslikka qaror qildim va Amerikaga ketdim, agar shartnomamni uzaytirganimda Yurgen Klopp qo‘l ostida olti oy o‘ynashim mumkin edi.
Ammo, albatta, Brendan qo‘l ostida menga o‘yin vaqtim kamayib ketishini aytishgan. "Liverpul"da zaxira o‘yinchisi bo‘lishni ham, rotasiya o‘yinchisi bo‘lishni ham xohlamasdim. O‘shanda ham o‘zimni jamoadagi eng yaxshi yarim himoyachi deb his qilardim.
O‘ylab qarasam, agar bunday bo‘lishini bilganimda shartnomamni uzaytirgan bo‘lardim, 100 foiz. Men Klopp bilan olti oy ishlash uchun Brendanga to‘rt yoki besh oy chidagan bo‘lardim. Bu aniq", - dedi Jerrard Daily Mail bilan suhbatda.
