"Nasaf" bosh murabbiyi Ro‘ziqul Berdiyev OCHL guruh bosqichi 4-turi doirasida bo‘lib o‘tgan "Sharja"ga qarshi o‘yindan so‘ng o‘z fikrlarini bildirib o‘tdi.

"G‘alaba uchun maydonga tushgandik, ammo hamma ko‘rdi: raqib 1 ochko uchun vaqtni cho‘zishga urindi. Shunga qaramasdan hisobni tenglashtira oldik. Ustunlik bizda bo‘ldi. Ko‘proq hujum qildik. Afsuski, natija biz kutgandek bo‘lmadi. Raqib bunchalik himoyalanishini kutmagandik. Chunki bunday tarkib bilan yorqinroq o‘ynasa bo‘lardi.

Jigauri penaltidan foydana olmagani va Davronov qizil kartochka olgani? Ha, birinchi golni biz urganimizda boshqacha bo‘lardi va oxirida Alibek ham ehtiyotkor o‘ynishi mumkin edi. Lekin, keling, bugun aybdorni izlamaylik. Jamoa sifatida shu natijaga erishdik.  

Tig‘iz taqvim? Mashg‘ulotlarni qisqa va kam o‘tkazyapmiz. Yarimhimoya va hujumda rotasiya qilyapmiz, lekin himoyada Shuhrat Muhammadiyevning jarohati bois bunday imkoniyatga ega emasmiz. Shu sabab G‘aybullayev va Nasrullayevda biroz toliqish sezilmoqda.  

Shtatli penaltichi? Bunday o‘yinchi qolmadi — hamma navbatma-navbat xato qilyapti. Menimcha, bu ruhiy jihat bilan bog‘liq. Chunki mashg‘ulotlarda ko‘p ishlaymiz va futbolchilar yaxshi tepishadi», — dedi Berdiyev.