Birozdan so‘ng start oladigan "Ahal"-"Paxtakor" o‘yini bo‘lib o‘tadigan "Ashxobod stadioni"ning sun’iy maydoni, 16 noyabr kuni JCH-2026 saralashining 1-turidan o‘rin olgan Turkmaniston-O‘zbekiston uchrashuviga ham mezbonlik qilishidan xabaringiz bor.

Ushbu sun’iy maydon 2012 yili o‘rnatilgan bo‘lib, o‘tgan 11 yil mobaynida umuman yangilanmagan. Ashxobod shahrining o‘zida 2 ta tabiiy maydonga ega stadion mavjud bo‘lishiga qaramasdan, O‘zbekistonga qarshi o‘yinni sun’iy maydonda o‘tkazish fikrini turkmanistonlik futbolchilarning o‘zi ham tushunishmayapti.

Bu tashabbus Turkmaniston terma jamoasi murabbiylar shtabi yoki futbol federasiyasidan chiqqan bo‘lib, undan ko‘zlangan asosiy maqsad - o‘zidan kuchliroq jamoaga qarshi o‘yinda raqib futbolchilari uchun qo‘shimcha qiyinchiliklar tug‘dirish, hattoki ularning jarohat olishlari uchun zamin yaratishdan iborat.

Albatta, "Paxtakor" ham, terma jamoamiz ham turkmanlarning "mehmondorchiligi"ga munosib javob qaytargan holda, har qanday sharoitda ham ulardan bir bosh ustun ekanligimizni isbotlashlariga ishonamiz.