Бироздан сўнг старт оладиган "Аҳал"-"Пахтакор" ўйини бўлиб ўтадиган "Ашхобод стадиони"нинг сунъий майдони, 16 ноябрь куни ЖЧ-2026 саралашининг 1-туридан ўрин олган Туркманистон-Ўзбекистон учрашувига ҳам мезбонлик қилишидан хабарингиз бор.
Ушбу сунъий майдон 2012 йили ўрнатилган бўлиб, ўтган 11 йил мобайнида умуман янгиланмаган. Ашхобод шаҳрининг ўзида 2 та табиий майдонга эга стадион мавжуд бўлишига қарамасдан, Ўзбекистонга қарши ўйинни сунъий майдонда ўтказиш фикрини туркманистонлик футболчиларнинг ўзи ҳам тушунишмаяпти.
Бу ташаббус Туркманистон терма жамоаси мураббийлар штаби ёки футбол федерациясидан чиққан бўлиб, ундан кўзланган асосий мақсад - ўзидан кучлироқ жамоага қарши ўйинда рақиб футболчилари учун қўшимча қийинчиликлар туғдириш, ҳаттоки уларнинг жароҳат олишлари учун замин яратишдан иборат.
Албатта, "Пахтакор" ҳам, терма жамоамиз ҳам туркманларнинг "меҳмондорчилиги"га муносиб жавоб қайтарган ҳолда, ҳар қандай шароитда ҳам улардан бир бош устун эканлигимизни исботлашларига ишонамиз.
