"Arsenal" skautlari "Real Sosyedad"ning "Benfika" bilan Chempionlar ligasi guruh bosqichi 4-tur uchrashuvini (3:1) tomosha qilishdi.

90min xabariga ko‘ra, ularning kuzatuviga asosiy sabab Ispaniya terma jamoasi yarim himoyachisi Martin Subimendining o‘yinini ko‘rish istagi bo‘lgan. Ilgari "Real Madrid" va "Barselona"ning nishoniga aylangan 24 yoshli futbolchi yanvar oyidagi transfer oynasi oldidan londonliklar uchun potensial variant sifatida paydo bo‘lmoqda.

Subimendining "Real Sosyedad" bilan shartnomasi 2027 yilning yoziga qadar mo‘ljallangan, tovon puli esa 50 million yevroni tashkil qiladi. Umuman olganda, ispaniyalik ushbu mavsumda jamoa safida barcha turnirlarda 17 ta o‘yin o‘tkazib, 1 ta gol urdi va 1 ta golli uzatmani amalga oshirdi.