Avstraliya terma jamoasiga so‘nggi paytlarda jalb etilayotgan futbolchilarga nazar tashlasangiz, "yashil qit’a" vakillarining "qorayib" ketayotganiga guvoh bo‘lasiz.

Avstraliya har doim ko‘pmillatli tarkibga ega bo‘lgan. 2010 yilgacha bo‘lgan davrda, avstraliyaliklar tarkibi kelib chiqishi serb-xorvat, britaniyalik, yunon va italiyaliklardan tashkil topgan.

Yaqindan boshlab esa, Avstraliya safida kelib chiqishi afrikalik futbolchilar ko‘pchilikni tashkil etishmoqda. Bu nima bilan bog‘liq? 1990-2000 yillarda Afrika davlatlaridagi qabilaviy va fuqarolar urushlaridan Avstraliyaga qochib kelgan qochqinlarning farzandlari voyaga yetishmoqda va hayotda o‘z yo‘lini topish uchun futbolni tanlashmoqda.

Hozirgi kunga kelib, Avstraliya safida 8 ta qora tanli futbolchilar harakat qilishmoqda:

1. Aver Mabil ("Grassxopper") - 1995 yil Keniyada, janubiy sudanlik qochqinlar oilasida tug‘ilgan. 10 yoshigacha qochqinlar lagerida yashagan va 2005 y oilasi bilan Adelaida shahriga ko‘chirilgan.

2. Garang Kuol ("Volendam") - 2004 y Misrda, janubiy sudanlik qochqinlar oilasida tug‘ilgan. Bir yil o‘tib, oilasi bilan Viktoriya shtatiga ko‘chirib kelingan.

3. Kusini Yengi ("Portsmut") - 1999 y Adelaidada, Avstraliyaga 70 yillarda ko‘chib kelgan janubiy sudanlik qochkinlar oilasida tug‘ilgan.

4. Tomas Deng ("Albireks Niigata") - 1997 y Keniyada, janubiy sudanlik qochqinlar oilasida tug‘ilgan. 6 yoshligida oilasi bilan Adelaidaga olib kelingan.

5. Muhammad Ture ("Reyms") - 2004 y Gvineyada, liberiyalik qochqinlar oilasida tug‘ilgan. Oilasi 14 yil Konakridagi qochqinlar lagerida yashab, Muhammad tug‘ilishi bilan Janubiy Avstraliya shtatiga ko‘chib kelishgan.

6. Nestori Irankunda ("Adelaida Yunayted"/"Bavariya") - 2006 y Tanzaniyada, burundilik qochqinlar oilasida tug‘ilgan. 3 oyligida oilasi bilan Pert shahriga ko‘chib kelishgan.

7. Kianu Bakkus ("Sent-Mirren") - 1998 y Janubiy Afrikaning Durban shahrida tug‘ilgan. Bir yoshga to‘lmasidan, oilasi bilan Sidneyga ko‘chib kelishgan.

8. Sem Silvera ("Midlsbro") - 2000 y Londonda tug‘ilgan yamaykalik futbolchi. Angliyada tug‘ilishiga qaramasdan, Avstraliyada ulg‘ayib, voyaga yetgan.