Nafas olishimizga qo‘ymagan 12 turning so‘nggi bahsi 4-4 hisobida yakun topdi. Unda "Chelsi" o‘z maydonida "Manchester Siti"ni qabul qilgandi. Xalqaro tanaffus oldidan muxlislar fantastik bahs va drama guvohiga aylandi. Sakkizta gol urilgan o‘yinda hamma narsani ko‘rdik. Hammasi yakunlangach, statistikalar asosida "Chelsi"ning eng yaxshi va yomon o‘yinchilariga nazar tashlamoqchimiz. Quyida shu haqida so‘z boradi.
Eng yaxshilar
Koul Palmer – 8/10
Yana kim ham bo‘lardi? Yoz oxirlayotgan bir paytda "Manchester Siti" tarkibini tark etgan Palmer, kecha sobiq jamoasini mag‘lub etish uchun shaylandi. Gvardiola tuzgan tarkibda joy qolmagach, Palmer "Chelsi"ga sotib yuborilgandi. Hujumchining o‘zi tarbiyalangan klubga qarshi ko‘rsatgan o‘yini ajoyib edi. 94 daqiqadagi penalti bilan "Chelsi"ga bir ochko olib berishdan tashqari, 21 yoshli futbolchi uchrashuv davomida dadil harakatlari bilan ajralib turdi. Palmer katta tezlik bilan ko‘p marta "shaharliklar" himoyasida tartibsizliklarga sabab bo‘ldi. Kecha Gvardiola hayolidan bir on, Palmerni bekor sotgani haqidagi o‘y o‘tgan bo‘lsa, ajab emas.
Raxim Sterling – 8/10
"Manchester Siti"ning sobiq yulduzlari o‘zlariga qarshi chiqishni yaxshi ko‘rishadi. Sterling ham xuddi Palmer singari o‘ng qanotni "yondirib" berdi. 28 yoshli vinger Uokerni bir necha bor aldab, xavfli vaziyatlar yaratishda qatnashdi. Qahramonimiz ushbu mehnatlari sababli mukofotlandi desak, mubolag‘a bo‘lmaydi. U jamoasining ikkinchi goliga mualliflik qilgan edi. 10 ballik sistemada sakkiz ball olish, Sterling uchun munosib baho deya olamiz.
Eng yomonlar
Aksel Disasi – 4/10
Disasi kecha APLda Xoland tomonidan "uxlatib" qo‘yilayotgan himoyachilardan biriga aylandi. Ammo u o‘zidan xafa bo‘lmasa ham bo‘ladi. Negaki, Disasi birinchisi emas, katta ehtimol bilan oxirgisi ham bo‘lmaydi. 25 yoshli futbolchi Xolandni ko‘p epizodlarda qo‘riqlashga qiynaldi deyish mumkin. Ham jismoniy, ham texnik jihatdan kecha Xoland butun boshli "Chelsi" mudofaasidan ustun edi. Shu sababdan Disasiga past baho berildi (4).
Mark Kukurelya – 4/10
Qanot himoyachisining eng katta qilgan xatolaridan biri bu Xolandga nisbatan ishlatgan qo‘polligi edi. Kukurelya sababli "Chelsi" juda erta gol o‘tkazdi. Oqibatda, londonliklar hisobda ortda qola boshladi. Bundan tashqari o‘yin davomida ispaniyalik futbolchi Fil Fodenni qo‘riqlab turish borasida muammolarga duch keldi. Kukurelyaning kechagi harakatlari umumiy olganda, xuddi Disasi kabi 4 ballga baholandi.
ISMATOV J.
