Moliyaviy qoidalarni buzgani uchun "Everton"dan Premyer-ligada 10 ochko olib tashlandi.

"Mustaqil komissiya "Everton"ga rentabellik va barqarorlik qoidalarini (PSRs) buzgani uchun 10 ochko olib qo‘ydi. Qaror darhol kuchga kiradi.

Premyer-liga klub ustidan shikoyat qildi va bu masalani yil boshida mustaqil komissiyaga topshirdi. Sud jarayonida klub 2021/22 yilgi mavsum bilan yakunlangan davr uchun PSRs qoidalarini buzganligini tan oldi, ammo buzilish darajasi munozaraliligicha qoldi.

O‘tgan oy besh kunlik tinglovdan so‘ng, komissiya "Everton"ning tegishli davr uchun PSRs hisob-kitobi Premyer-liga tomonidan da’vo qilinganidek, 124,5 million funt sterling yo‘qotishga olib kelganligini aniqladi. Bu PSRs bo‘yicha ruxsat etilgan 105 million funt sterling chegarasidan oshib ketdi.

Komissiya 10 ochkolik sport sanksiyasini qo‘llash kerak degan xulosaga keldi. Ushbu sanksiya darhol kuchga kiradi", - deyiladi Premyer-liga bayonotida.

Ushbu jazoga qadar "Everton" 12 turda 12 ochko jamg‘arib, APL turnir jadvalida 16-o‘rinda edi. Endilikda jamoa hisobida 2 ochko bor, u turnir jadvalida so‘nggi o‘ringa tushib ketdi.