Молиявий қоидаларни бузгани учун "Эвертон"дан Премьер-лигада 10 очко олиб ташланди.
"Мустақил комиссия "Эвертон"га рентабеллик ва барқарорлик қоидаларини (PSRs) бузгани учун 10 очко олиб қўйди. Қарор дарҳол кучга киради.
Премьер-лига клуб устидан шикоят қилди ва бу масалани йил бошида мустақил комиссияга топширди. Суд жараёнида клуб 2021/22 йилги мавсум билан якунланган давр учун PSRs қоидаларини бузганлигини тан олди, аммо бузилиш даражаси мунозаралилигича қолди.
Ўтган ой беш кунлик тингловдан сўнг, комиссия "Эвертон"нинг тегишли давр учун PSRs ҳисоб-китоби Премьер-лига томонидан даъво қилинганидек, 124,5 миллион фунт стерлинг йўқотишга олиб келганлигини аниқлади. Бу PSRs бўйича рухсат этилган 105 миллион фунт стерлинг чегарасидан ошиб кетди.
Комиссия 10 очколик спорт санкциясини қўллаш керак деган хулосага келди. Ушбу санкция дарҳол кучга киради", - дейилади Премьер-лига баёнотида.
Ушбу жазога қадар "Эвертон" 12 турда 12 очко жамғариб, АПЛ турнир жадвалида 16-ўринда эди. Эндиликда жамоа ҳисобида 2 очко бор, у турнир жадвалида сўнгги ўринга тушиб кетди.
