«Арсенал» ҳимоячиси Вильям Салиба бошқа клубларнинг эътиборини тортишда давом этмоқда.

Журналист Экрем Конурнинг берган маълумотига кўра, франциялик футболчини ўз сафига қўшиб олиш учун курашга «Барселона» ҳам қўшилган. «Кўк-анорранглилар» анчадан бери ўйинчи атрофидаги вазиятни кузатиб келаётган «Реал Мадрид» ва «ПСЖ» клублари қаторидан жой олди. «Канонирлар» эса ўз ҳимоячисини қўйворишни исташмаяпти — Лондон клуби Салибани 150 миллион евродан камига қўйиб юбормайди.

Вильям Салиба 2019 йилда «Сент-Этьен»дан «Арсенал»га 30 миллион евро эвазига кўчиб ўтган эди. Унинг амалдаги шартномаси 2030 йилнинг 30 июнига қадар мўлжалланган. 2025/2026 йилги мавсумда франциялик ҳимоячи Лондон клуби сафида барча турнирларда 50 та ўйинда майдонга тушиб, 1 та гол урди ва 1 та голли узатмани амалга оширди.