«Пахтакор» клубларининг собиқ ҳужумчиси Азамат Абдураимов Жаҳон чемпионати–2026 гуруҳ босқичининг 2-турида Ўзбекистон — Португалия (0:5) учрашувидан кейин Ўзбекистон терма жамоаси ҳимоячиси Абдуқодир Ҳусанов ҳамда Криштиану Роналду ўртасида кечган суҳбат ҳақида гапирди.
— Ўзбекистонда яна янги Абдуқодир Ҳусановлар етишиб чиқишини кутса бўладими?
— «Албатта! Фахр билан айта оламанки, Ҳусанов менинг шогирдларимдан бири. Мен у билан 14 ёшидан 16 ёшигача ўсмирлар терма жамоасида ишлаганман. Ўша пайтнинг ўзидаёқ у футболга жуда меҳр қўйган, иштиёқли йигит эди. Футбол унинг ҳаётидаги энг муҳим нарса бўлган. Бунинг устига, отаси ҳам футболчи.
Ўзбекистонда бундай иқтидорлар бор. Терма жамоаларимиз сўнгги йилларда Осиё чемпионатларида ғолиб бўлаётгани, турли ёш тоифаларида Жаҳон чемпионатларига чиқаётгани ёшларга ўзини кўрсатиш ва Абдуқодир каби кучли клублардан таклиф олиш учун катта туртки бўлмоқда».
— Унинг шундай даражага чиқиши, «Манчестер Сити» асосий таркибидан жой олиши ва ҳатто мавсумнинг энг яхши уч футболчисидан бири бўлишини тасаввур қилганмидингиз?
— «Ростини айтсам, ҳеч қачон! Агар ўшанда буни билганимда, агенти бўлардим, ҳа-ҳа! Аммо унинг жуда яхши бола, терма жамоамдаги энг иқтидорли йигитлардан бири эканини яхши билардим. Шунинг учун ундан жуда хурсандман. Ҳар гал учрашганимизда унга омад тилайман ва фаолиятининг бошида қандай профессионал бўлган бўлса, шундайлигича қолишини истайман».
— Жаҳон чемпионати давомида у билан гаплашишга улгурдингизми?
— «Йўқ. Бу жуда масъулиятли палла эди. Фақат мен эмас, ҳаммамиз футболчиларнинг руҳий ҳолатини тушуниб, уларни безовта қилмасликка ҳаракат қилдик. Мен унинг отаси билан дўстман, у биз билан ветеранлар жамоасида тўп тепади. Саломимни отаси орқали етказдим.
Отаси менга қизиқ бир воқеани айтиб берди. Абдуқодир билан Криштиану Роналду ўртасида шундай мулоқот бўлган экан. Роналду унга: "Сен жуда тезкорсан", дебди. Абдуқодир эса: "Сиз ҳам жуда тезкорсиз", деб жавоб берибди. Шунда Роналду: "Йўқ, мен энди қариб қолдим", деб ҳазил қилган. Кейин эса унга голни нишонлаганда қўлини оғзига қўймасликни маслаҳат берибди, чунки ҳозир бу ҳаракат учун майдондан четлатишлари мумкинлигини айтган».
