Норвегия терма жамоаси ҳужумчиси Эрлинг Ҳоланд Жаҳон чемпионати–2026да ноёб статистик натижа қайд этди.

Opta Analyst маълумотига кўра, Ҳоланд ушбу мундиалда тўпга ҳар бир тегишининг 7,25 фоизини голга айлантирган. 1966 йилдан буён Жаҳон чемпионатларида камида 60 марта тўпга теккан футболчилар орасида ҳеч ким бундан юқори самарадорлик кўрсаткичига эришмаган.

Аввалроқ Ҳоланд Жаҳон чемпионати 1/16 финалида Кот-д'Ивуарга қарши баҳсда ғалаба голини киритиб, Норвегия терма жамоасининг 1/8 финалга чиқишига катта ҳисса қўшган эди. Учрашувнинг 86-дақиқасида урилган гол норвегияликларга 2:1 ҳисобидаги ғалабани келтирган.

Жаҳон чемпионати 1/8 финалида Норвегия терма жамоаси Бразилияга қарши майдонга тушади.