Kechagi Turkmaniston-O‘zbekiston uchrashuvining asosiy qahramonlari, so‘zsiz, Otabek Shukurov va Eldor Shomurodov bo‘lishdi.

Lekin, qanot himoyachimiz Hojiakbar Alijonovning terma jamoa uchun sadoqatini alohida ta’kidlab o‘tish lozim. Menisk (tizza bo‘g‘imidagi pay) operasiyasini boshdan kechirgan futbolchimizga sun’iy maydonda to‘p tepish shifokorlar tomonidan ta’qiqlangan.

Shu sababdan ham, Alijonov sun’iy maydonlarda o‘tkazilgan - Meksika terma jamoasiga qarshi o‘rtoqlik uchrashuvi va "Ahal"ga qarshi OCHL uchrashuvida maydonga tushirilmagan. Turkmanistonga qarshi JCH saralash o‘yinida esa futbolchimiz eski jarohatini yangilab olish xavfi ostida bo‘lsa ham maydonga tushishga qaror qilgan.

Kechagi o‘yinda raqib futbolchisi Abdi Bashimov sariq kartochka olgan vaziyatda, Alijonovning oyog‘iga kuchli zarba berdi. Shunga qaramasdan, Alijonov maydonni tark etishni xohlamagan va faqatgina shifokorlar tavsiyasiga ko‘ra, futbolchimiz 75-daqiqada almashtirilgan.