Кечаги Туркманистон-Ўзбекистон учрашувининг асосий қаҳрамонлари, сўзсиз, Отабек Шукуров ва Элдор Шомуродов бўлишди.

Лекин, қанот ҳимоячимиз Ҳожиакбар Алижоновнинг терма жамоа учун садоқатини алоҳида таъкидлаб ўтиш лозим. Мениск (тизза бўғимидаги пай) операциясини бошдан кечирган футболчимизга сунъий майдонда тўп тепиш шифокорлар томонидан таъқиқланган.

Шу сабабдан ҳам, Алижонов сунъий майдонларда ўтказилган - Мексика терма жамоасига қарши ўртоқлик учрашуви ва "Аҳал"га қарши ОЧЛ учрашувида майдонга туширилмаган. Туркманистонга қарши ЖЧ саралаш ўйинида эса футболчимиз эски жароҳатини янгилаб олиш хавфи остида бўлса ҳам майдонга тушишга қарор қилган.

Кечаги ўйинда рақиб футболчиси Абди Башимов сариқ карточка олган вазиятда, Алижоновнинг оёғига кучли зарба берди. Шунга қарамасдан, Алижонов майдонни тарк этишни хоҳламаган ва фақатгина шифокорлар тавсиясига кўра, футболчимиз 75-дақиқада алмаштирилган.