Yangi mavsumni omadsiz boshlagach, "Manchester Yunayted" qishki transferlar oynasida bir nechta xaridlarni amalga oshirishi kutilmoqda. Ha, Erik ten Xag shogirdlari APLning so‘nggi 5 ta turidan 4 tasini yutdi. Ammo g‘alabalar qiyinchilik bilan qo‘lga kiritildi. Qolaversa, "Manchester Siti", "Nyukasl" va "Kopengagen"dan uch xil turnirda mag‘lubiyatga uchradi. Shu sabab tarkibni kuchaytirish lozim. Quyida "MYU"ning mavsumini qutqarib qolishi mumkin bo‘lgan bir nechta nomlar keltiriladi.
Jan-Kler Todibo
Lui Sa Todibo haqida shunday degandi: "U yaxshi himoyachi. Hozir Fransiya termasi himoyachilar borasida oltin avlodga ega. Shu sababli Todiboga imkoniyat berilmayapti. Ammo kuzatishlarimdan shuni bilamanki, unda hamma xislatlar mujassam. "MYU"ga aynan Todibo kabi futbolchilar kerak".
Aslini olganda, haqiqatdan ham shunday. Todiboning statistikasiga nazar solsangiz, u so‘nggi 7 ta o‘yinda o‘z darvozasidan birorta to‘p o‘tkazmaganiga guvoh bo‘lasiz.
Mark Gexi
Todibo "MYU" himoyasi uchun kamlik qiladi. Jamoaga yana bir vakil zarur va u Gexidir. Angliya terma jamoasi a’zosi ayni damda 60 million funtga baholanmoqda. Hozirda parokanda bo‘lib yotgan mudofaani tiklashda, Gexi ten Xagga katta yordam bergan bo‘lardi. 23 yoshli futbolchining "Kristal Pelas" bilan tuzgan shartnomasi 2025 yilda yakun topadi.
Tijjani Reynders
Erik ten Xag jamoaga yana bir niderlandiyalik futbolchi olib kelishni reja qilgan. "Milan"da ajoyib harakatlari bilan ajralib turgan Reynders ana shu vakildir. 25 yoshli yarim himoyachi o‘tgan yozda "AZ Alkmaar"dan 20 million yevro evaziga sotib olinadi. Hozirda Reynders Niderlandiya terma jamoasida asosiy tarkib futbolchisiga aylangan. Uning "Milan" bilan tuzgan besh yillik shartnomasi bor. Shu sabab Reyndersni sotib olish oson kechmaydi.
Arnau Martines
Martines borasida "Real", "Barselona" hamda "Manchester Siti"lar harakat boshlab yuborgan. Qanot himoyachisi "Jirona" bilan fantastik o‘yin ko‘rsatmoqda. Ispaniya yoshlar terma jamoasi a’zosi qishda "MYU"ga ham kerak bo‘lib qoladi.
Artur Vermeren
Vermeren aslida "Arsenal"ning yarim himoya borasidagi rejalariga kiritilgandi. Ammo uning xaridi "MYU"ga ham nasib etib qolishi hech gap emas. Belgiyalikka to‘pchilardan tashqari "Chelsi" va "MYU" ham qiziqish bildirgan. Ushbu klub skautlari Vermerenni jiddiy kuzatmoqda.
ISMATOV J.
