«MYU»ga sig‘mayotgan iqtidor Jeydon Sancho oldinroq klubning whatsapp tarmog‘i suhbatxonasidan ham chetlashtirilgandi.

Ma’lum bo‘lishicha, bunga oddiy bir o‘rinsiz yoki omadsiz xabar sabab bo‘lgan. To‘g‘ri, Sanchoning xabari fotoshop bo‘lishi ham mumkin.

Angliya tabloidlari tomonidan aniqlashtirilishicha, qobiliyatli vinger messenjerlardan biridagi jamoa chatidan «Fulxem» bilan o‘yin yakunida chetlashtirilgan. O‘shanda «MYU» 1:0 hisobida g‘alaba qozongandi. Aniqroq aytsak, Jeydon amaldagi klubi natijasiga istehzoli munosabat bildirgan: «Omad keldi». To‘g‘ri, hozir angliyalik futbolchi akkauntida bunday «tvit» yo‘q. Bu borada ikki taxmin bor: xabarni Sanchoning o‘zi o‘chirib tashlagan yoki kimdir fotoshop skrinshoti vositasida «qizil iblislar» mikromuhitini yanada yomonlashtirishni o‘ylagan. Aytish kerak, hujumkor qanot futbolchisi anchadan buyon «MYU» akademiyasida alohida shug‘ullanmoqda. Daily Mail nashrida yozilishicha, bunda Sancho bir qator shartlarga qat’iy ravishda rioya etishi lozim. Deylik, kiyinish xonasiga kirganida, eshikni qulflab olishi talab etiladi. Binobarin, uning yo‘li asosiy jamoa futbolchilari va hatto akademiya tarbiyalanuvchilari bilan kesishmasligi kerak.

Eslatma, sentabr oyi boshida Sancho va «MYU» bosh murabbiyi Erik ten Xag o‘rtasida mojaro kelib chiqqandi. O‘shanda vinger APL 4-turidan o‘rin olgan «Arsenal»ga qarshi bahs (1:3)da maydonga tushirilmadi. Niderlandiyalik mutaxassis o‘yindan keyin buni 23 yoshli futbolchi mashg‘ulotlarda yaxshi ishlamagani bilan izohladi. Sancho esa ten Xag bayonotiga «tvitter» orqali keskin javob berdi: «Anchadan buyon aybsiz aybdor bo‘lib qolyapman - bu adolatdan emas. Mashg‘ulotlarda hamon qattiq mehnat qilyapman, har bir izohga ishonavermang. Tarkibdan chetda qolganida esa boshqa sabablar bor, bunga ishonchim komil». Ko‘p o‘tmay, bu «tvit» o‘chirildi, ammo 14 sentyabr kuni futbolchi asosiy jamoadan vaqtincha chetlashtirildi.