Italiyada bir necha kun oldin jasadi Pordenone shahri yaqinidagi jarlikdan topilgan 22 yoshli Yuliya Chekkettinning o‘ldirilishi yuzasidan notinchlik kuzatilmoqda.
Spaletti qotillarni qo‘rqoqlar deb atadi va A Seriyaning rahbari esa zo‘ravonlikka qarshi kurashni e’lon qildi. Italiya terma jamoasi bosh murabbiyi Luchano Spaletti bundan g‘azablandi.
«Biz endi maftunkor shahzodalar qiyofasida kiyinadigan bu qo‘rqoqlarga toqat qila olmaymiz. Biz ayollarga ularning xavfsizligiga tahdid solayotgan har qanday odamdan uzoqlashishga yordam berishimiz kerak. Ayolni o‘ldirgan erkaklar qo‘rqoqliklarini tan olishadi. O‘zaro munosabatlardagi muammolarni zo‘ravonlik bilan hal qilish mumkin deb o‘ylaydiganlar, kelajagi yo‘q mag‘lublardir», – dedi murabbiy.
A Seriya rahbari Lorenso Kasini zo‘ravonlikka qarshi kampaniyani e’lon qildi:
«Ushbu dramatik tarix tufayli biz har yili o‘tkazib kelayotgan «qizil chiroq» zo‘ravonlikka qarshi kampaniyamiz yanada kengroq tus oladi. Biz barcha klublarni, barcha liga elchilarini ayollarga nisbatan har qanday qabih va shafqatsiz xatti-harakatlarni qoralash va oldini olishga chaqiramiz.
Tez orada ayollarga nisbatan zo‘ravonlikka barham berish xalqaro kuni (25 noyabr) nishonlanadi. Aniq va qat’iy g‘oyalarni taklif qilish muhimdir. Futbol ayollarga nisbatan har qanday zo‘ravonlikni keskin qoralaydi va butun mamlakatni tashvishga solayotgan jinoyatlarni sodir etayotganlarni stadionlarda ko‘rishni istamaydi».
Aynan nima bo‘lgandi?
18 noyabr kuni Yuliya Chekkettin jarlikda bo‘yin va boshiga yigirma marta pichoq bilan urilgan holatda, o‘lik holda topilgan. U bir hafta oldin bedarak yo‘qolgani haqida xabar berilgan edi va polisiya o‘shandan beri qidirib yurgan.
Qotillikda asosiy gumonlanuvchi 22 yoshli Filippo Turetta, Yuliyaning sobiq sevgilisidir. Ular bir yarim yil uchrashishdi va 2023 yilning yozida ajralishdi, shundan beri ular do‘stona munosabatlarni saqlab qolishmagan.
11 noyabr kuni Yuliya va Filippo savdo markazi yonida uchrashishdi. Guvohlarning so‘zlariga ko‘ra, ular o‘rtasida mojaro boshlangan. Kuzatuv kameralari bir yigitning avtoturargohda qizni qanday kaltaklagani, keyin esa uni mashinasiga sudrab olib kirganini yozib oldi. Filippo Germaniyada 16 noyabr kuni hibsga olingan, hozirda uni ekstradisiya qilish masalasi hal qilinmoqda.
Italiyada uni umrbod qamoq jazosi kutmoqda.
A Seriya muntazam ravishda ayollarni qo‘llab-quvvatlaydi. Liga ayollarga nisbatan zo‘ravonlik muammosiga e’tibor qaratish maqsadida ketma-ket bir necha mavsum tadbirlar o‘tkazmoqda. Qo‘llab-quvvatlash belgisi sifatida chempionat o‘yinlari paytida o‘yinchilar va murabbiylar yuzlariga qizil bo‘yoq chizilgan holda o‘ynashadi.
Klubning alohida tashabbuslari ham bor. Ikki yil oldin «Spesiya» futbolchilari o‘z futbolkasida #WeForShe yozuvi bilan o‘yinlardan biriga kirgan edi. O‘shanda uchrashuv mehmoni zo‘ravonlik bilan bog‘liq muammolar tufayli o‘z vatanini tark etgan afg‘onistonlik Rahilu Saya ismli qiz edi.
