Futbol bo‘yicha O‘zbekiston superligasining 25-turi kutilmagan natijalarga boy bo‘lmoqda. Jumladan, musobaqa g‘olibligi uchun kurashayotgan Qarshining "Nasaf" klubi o‘z maydonida "So‘g‘diyona" bilan 0:0 hisobida durang qayd etdi va chempionlik bahsidan chiqdi. Bugun, 24 noyabr kuni "Paxtakor" Toshkentda "Surxon"ni mag‘lubiyatga uchratib, 3 ochkoni qo‘lga kiritsa, chempionat yakuniga bir tur qolganida muddatidan oldin bosh sovrinni qo‘lga kiritadi. Mazkur bahs bugun “Paxtakor” stadionida soat 18:15 start oladi.

“OKMK” ushbu turda safarda “Buxoro”ga qarshi bahs olib bordi va 0:1 hisobida g‘alaba qozongan bo‘lsa, “Andijon” safarda “Turon”ga qarshi maydonga tushdi va 3:1 hisobida g‘alaba qozondi. "Bunyodkor" ham o‘z maydonida "Metallurg"ni 1:0 hisobida yengib, uch ochkoni qo‘lga kiritdi.

Shuningdek, "Neftchi" Farg‘onada "Qizilqum"ni minimal 1:0 hisobida taslim qildi. Mazkur o‘yindan so‘ng "Qizilqum" oxirgi turda qanday natija qayd etmasin, musobaqa jadvalining 12-pog‘onasida qoladigan bo‘ldi va 6 dekabr kuni "Qo‘qon-1912" jamoasi bilan Superliga yo‘llanmasi uchun raqobatlashadi.

Bugun, 24 noyabr kuni “Jar” stadionida “Olimpik” klubi “Navbahor”ni qabul qiladi. Ushbu bahs soat 16:00 da boshlanadi.