Italiyada shaxmat bo‘yicha yoshlar o‘rtasidagi jahon chempionati bo‘lib o‘tdi.

Unda 14 yoshgacha bo‘lgan sportchilar orasida o‘zbekistonlik Afruza Hamdamova jahon chempioni unvoniga sazovor bo‘ldi. Qayd etib o‘tish joiz, Afruza O‘zbekiston tarixida qizlar o‘rtasidagi ilk jahon chempioniga aylandi.

26 noyabr tongida Afruza O‘zbekistonga qaytib keldi. Sportchi musobaqa jarayoni, chempionlik taassurotlari bilan bo‘lishdi.

"Men ushbu g‘alabamni xalqimga, prezidentimga bag‘ishlayman. Raqiblarimning barchasi yaxshi shaxmatchilar edi. Ularga qarshi bir necha yildan buyon o‘ynab kelganim sababli, qanday yurishlarni amalga oshirishini yoddan bilardim.

Asosiy o‘yinlarda qora ranglarda o‘ynash qiyinchilik tug‘dirdi. Agar ular xato qilsagina mening g‘alaba qozonish imkoniyatim oshardi. Xato qilmasa, o‘yin durang bilan yakunlanardi.

Raqiblarimning asosiy kamchiligi oxirida endshpilda yaxshi o‘ynay olmasligi bo‘ldi. Shu sababli qaysi rangda bo‘lishimdan qat’i nazar endshpilda g‘alaba qozondim. Eng katta maqsadim — O‘zbekiston bayrog‘ini baland ko‘tarish, ayollar o‘rtasida eng yosh grossmeysterga aylanish", — dedi Afruza Hamdamova.

Shuningdek, Afruzaning onasi ham uydagi shaxmatga bo‘lgan munosabat, qizining chempionligidan naqadar xursand bo‘lgani haqida aytib o‘tdi.

"Ona sifatida judayam xursandman. Farzandining yutug‘ini ko‘rish, har qanday onaning orzusi.

Musobaqaga ketishdan oldin viza bilan bog‘liq muammolar bo‘ldi. Shu sababli 1 ta turni o‘tkazib yubordi. Shunda ham boraverasanmi, yutishingga ko‘zing yetadimi, degan savolga o‘ylanib qoldi-da, yutishimga 80 foiz ishonchim komil deb javob berdi.

Qizim chempionligi bilan O‘zbekiston tarixiga kirdi. Dadasi qo‘ng‘iroq qilib, xabarni yetkazganida, judayam xursand bo‘ldim.

Oilaviy muhit eng asosiy sabab. Chunki dadasi ham, amakilari ham shaxmat bilan shug‘ullanib kelgan. Dadasi murabbiy sifatida juda qattiqqo‘l. Dada sifatida qaraganda, bu yutuqlarga erisha olmasdi deb o‘ylayman", — dedi Shabnam Ismatova.