Xabi Alonso boshqaruvidagi «Bayer» joriy mavsum startidagi qoyilmaqom statistikasi bilan hammani birdek hayratlantirmoqda

Hozirgi holatda Leverkuzen «banda»si Yevropaning eng kuchli klublaridan biri bo‘lib turibdi. Qarang, Germaniya jamoasi bu mavsum biror turnirda hali mag‘lubiyat ko‘chasiga kirgani yo‘q. «Bayer» statistikasiga qaragan kishining og‘zidan beixtiyor bir ibora chiqadi: «bay-bay...».

G‘olibona yurish. Hozirda «sherlar» (jamoa laqabi) hisobida 18ta g‘alaba va 1tagina durang bor. Bu 19ta o‘yin samarasi. «Dorishunoslar» xususan, Germaniya kubogidan o‘rin olgan 2ta o‘yinni umumiy 13:2 hisobida o‘z foydasiga hal qildi. Xabi Alonso jamoa­si shuningdek, Yevropa Ligasida ham 100 foizlik natijaga ega - 4ta g‘alaba.

Germaniyada eng zo‘ri. Faqat Bundesliga o‘yinlariga qarasak, Leverkuzen jamoasi dastlabki 12 ta turda 11 ta g‘alaba va 1 ta durang qayd etdi. Gollar nisbati - 37-10. Oddiy aytganda, 1ta uchrashuvga o‘rtacha hisobda 3tadan ko‘p gol to‘g‘ri kelmoqda.

Yetakchi. «Bayer» 34 ochkoga ega va Bundesliga turnir jadvalida «Bavariya»dek nahang­dan oldinda bormoqda. Qolaversa, YEL «H» guruhi karvonboshisi ham aynan Leverkuzen «banda»si.