Osiyo Chempionlar ligasi guruh bosqichi, 5-turidan o‘rin olgan “Navbahor” – “Al-Hilol” uchrashuvidan oldingi matbuot anjumanida mezbonlar bosh murabbiyi Samvel Babayan va tajribali yarim himoyachi Azimjon Ahmedov qatnashib, bo‘lajak bahs borasida o‘z fikrlarini bildirishdi.

Samvel Babayan: — Assalomu alaykum! Ertaga guruhimizda jamoamiz va raqibimiz “Al-Hilol” uchun juda muhim bo‘lgan o‘yin bo‘lib o‘tadi. Ertangi raqibimiz ayni paytda qit’amizning eng kuchli klublaridan biri, juda yaxshi shakllangan, yaxshi ijrochilarga ega va hozirgi paytda  “Al-Hilol”ni Yevropaning eng yaxshi mutaxassislaridan biri boshqarmoqda. Bunday raqibga qarshi esa yigitlar yuqori saviyada, fidokorlik bilan o‘ynashlari kerak. Bundan tashqari, biz ertaga o‘z maydonimizda o‘ynaymiz hamda muxlislarning qo‘llab-quvvatlashlari ham jamoamizga ruh va kuch bag‘ishlaydi, degan umiddaman. Shuningdek, futbol mo‘’jizasiga ham umid qilamiz. Jamoamizning OCHLdagi asosiy maqsadi — pley-off bosqichi yo‘llanmasini qo‘lga kiritish. Shunday ekan, bo‘lajak bahsda muxlislarimizga quvonch ulashish uchun barcha imkoniyatimizga ishga solamiz.

Azimjon Ahmedov: - Assalomu alaykum! Ertangi o‘yin qiziqarli kechishiga shubham yo‘q. Boisi, “Al-Hilol” kuchli jamoa. Xudo xohlasa, g‘alaba qozonib, muxlislarni xursand qilamiz, degan umiddaman.

Fursatdan foydalanib, “Navbahor”ning OCHLdagi shunday muvaffaqiyatli ishtirokiga munosib hissasini qo‘shayotgan, jamoamiz uchun barcha sharoitlarni yaratib berayotgan Namangan viloyati hokimiga jamoamiz nomidan minnatdorchilik bildiraman.

“Navbahor” PFK matbuot xizmati.