Sun’iy ongga asoslangan kompyuter yakuniy APL jadvalini taxmin qildi. Afsuski, u chiqargan xulosalarni hali ham "Manchester Yunayted" uchun normal deya baholash qiyin. Mavsumni omadsiz boshlaganidan keyin, Erik ten Xag tanqidlarga sabab bo‘layotgan edi. Ammo so‘nggi uchta turda "qizil iblislar" g‘alaba qozongan holda, o‘z darvozasidan birorta gol o‘tkazib yubormadi. "Everton" ustidan qozonilgan yirik hisobdagi g‘alabadan keyin, "MYU" oltinchi o‘ringa ko‘tarilib oldi. Ayni damda mankunianliklarni kuchli to‘rtlikdan atigi 4 ochko ajratib turibdi.
Superkompyuter hisob-kitoblariga e’tibor beradigan bo‘lsak, Erik ten Xag jamoasini yaxshi mavsum kutmayapti. Xususan, "MYU" mavsumni "Chelsi"dan pastroqda, sakkizinchi o‘rinda yakunlaydi.
Kay Xavers so‘nggi daqiqalardagi goli bilan "Arsenal"ga uch ochko taqdim etgandi. Bu orqali to‘pchilar eng yaqin ta’qibchilari bo‘lgan "Manchester Siti" va "Liverpul"dan o‘zib ketdi. Natijada 30 ochko bilan London klubi yetakchi maqomida turibdi. Superkompyuter qilgan taxmin asosida aytadigan bo‘lsak, bu narsa yetarli bo‘lmaydi. "Arsenal" bu mavsum ham "shaharliklar"ga imkoniyatni boy berib, mavsumni ikkinchi o‘rinda yakunlaydi. Kuchli to‘rtlik "Nyukasl" hamda "Liverpul" bilan to‘ldiriladi. Beshinchi o‘ringa "Aston Villa" joylashadi.
"Tottenxem" bu mavsumni fantastik darajada boshlagan edi. Ammo ketma-ket uchta mag‘lubiyatdan keyin, superkompyuter "shporlar"ni YECHLga chiqa oladi deb o‘ylamayapti. Bu jamoa uchun maksimum o‘rin bu, mavsum so‘nggida 6 pog‘ona bo‘ladi. Taxminiy jadval oxiriga qaraydigan bo‘lsak, "Everton" doimiy ishi bo‘lgan, APLda qolishning uddasidan chiqishiga guvoh bo‘lamiz. Garchand mersisaydliklardan 10 ochko olib tashlangan bo‘lsa ham, bu klub mavsum oxirida elitada jon saqlab qola oladi.
"Luton Taun"ning shanba kungi g‘alabasi yakunda hech nimani hal qilmaydi. Rob Edvards boshchiligidagi klub "Kristal Pelas"ni o‘z maydonida mag‘lub etib, mavsumdagi ilk g‘alabasini qo‘lga kiritgandi. Ammo ular baribir Chempionshipga tushib ketadi. Shuningdek, yangi ko‘tarilgan ikki jamoa, "Byornli" va "Sheffild" ham darrov quyi ligaga qaytishi aytilgan.
ISMATOV J.
