"Inter" himoyachi Denzel Dyumfris bilan hamkorlikni uzaytirish borasida kelishuvga erisha olmadi. Bu haqda La Gazetta dello Sport xabar bermoqda.

Manbaga ko‘ra, "neradzurrilar" rahbarlari niderlandiyalik himoyachiga yiliga 4 million yevro maosh taklif qilishgan. Biroq futbolchining vakillari o‘z mijozining yana 1 million yevro olish istagini aytib, taklifni rad etishdi.

Ma’lum qilinishicha, tomonlar yangi yilda navbatdagi muzokaralar raundini o‘tkazishni rejalashtirishgan. Agar kelishuvga erishilmasa, niderlandiyalik futbolchi yozgi transfer oynasida sotiladi.

Dyumfris 2021 yildan beri "Inter"da o‘ynab kelmoqda. Joriy mavsumda himoyachi barcha musobaqalarda 16 ta o‘yin o‘tkazib, 2 ta gol va 4 ta golli uzatmani amalga oshirdi. Futbolchining klub bilan shartnomasi 2025 yilning iyun oyi oxirigacha amal qiladi. Transfermarkt portali futbolchining narxini 28 million yevroga baholamoqda.